Wednesday, September 21, 2011

နတ္ထိနိုင်ငံတော်သို့ ခြေလှမ်းစတင်ခြင်း



(၁)

ပွဲတော်ည……။

ဂီတဖျော်ဖြေပွဲည…..။

ဒီပွဲမှာ နိုင်ကိုနိုင်ရမည်။ သူမသာလျှင် ပွဲတော်ည၏ မီးရှူးတန်ဆောင်။ သူမသာလျှင် ဂီတတို့၏ နတ်ဖုရား။ သူမ၏ အနုပညာမှော်ဖြင့် ပွဲတော်ညကိုသိမ်းပိုက်မည်။ သူမဘ၀မှာ အရှုံးဆိုသည့် စကားလုံး မရှိစေရ။ ပွဲတော်ည၏ မီးရှူးတိုင်သည် သူမ၏အနုပညာဖြင့် ညီးညီးလင်းပသွားစေရမည်။ သူမ…အက်ဖရိုဒိုက်တီ၏ည….။ အထူးချွန်ဆုံးဂီတပညာရှင်သာ ထွန်းညှိခွင့်ရမည့် မီးရှူးတိုင်သည် သူမ၏လက်ဖြင့် လင်းပွင့်ထိန်တောက်သွားစေရမည်။


သူမ၏ ဂီတနည်းပြ…။ ခဏလေးနားထားစမ်းပါ။ နည်းပြဆိုသည်မှာ နည်းစနစ်များကို သီအိုရီတွေဖြင့် ဖွင့်ဆိုရှင်းပြသင်ကြားပေးမည့်သူ။ သူမအဖို့ နည်းပြမလိုအပ်။ နည်းပြတွေကို သူမ မယုံကြည်။ ဂီတတစ်ခုကို နည်းစနစ်တွေ၊ စည်းမျဉ်းတွေဖြင့် ပုံစံချယူဖို့ သူမ လက်မခံ။ နှလုံးသားက ခံစားချက်သက်သက်ဖြင့် သိစိတ်မဲ့ စိမ့်ယိုကျလာမှုကိုသာ ဂီတဟု သူမ ပြင်းပြင်းရှရှ ယုံကြည်ထားခဲ့။

.......................................................................................................................................

(၂)


``သမီးက ဂီတကို ဖန်တီးချင်တာလား´´

အဖိုးအို၏အမေးကို ခေါင်းငြိမ့်အဖြေပေးရင်း မျက်ရည်တစ်စက လမ်းမပေါ်သို့ ပေါက်ကနဲ။ `မွေးရာပါ ဆွံ့အ နားမကြား´ ဆိုသည့်အားနည်းချက်က သူမကို အရာရာမှာ နောက်ကောက်ကျစေခဲ့။ ခန္ဓာကိုယ်တွင်းစီးဆင်းနေသည့် ဂီတသွေးတို့ကို ထိုအားနည်းချက်ကပင် လေးတန့်နှေးကန်စေခဲ့။ သူမ အားကျသည့်၊ သူမ လေးစားသည့် အဖိုးအို၏ရှေ့တွင် တယောအိုလေးကိုပိုက်ရင်း ခေါင်းငိုက်စိုက်ဖြင့်သူမ ………။ အဖိုးအိုက သူ့အနုပညာအတွက် ဂုဏ်ပြုသွားကြသည့် အကြွေစေ့လေးများကို လမ်းပေါ်မှလိုက်ကောက်သိမ်းရင်း ….. ….


``ဂီတဆိုတာ….ပါးစပ်ကပြောပြမှ…ပြောနိုင်မှ၊ နားကကြားရမှ၊ မျက်လုံးကမြင်ရမှ ဂီတမဟုတ်ဘူးသမီး… နှလုံးသားကမြင်နိုင်တွေ့နိုင်ရင်ပဲ ဂီတဖြစ်နေပါပြီ…တကယ်တော့ ဂီတဆိုတာကို နှလုံးသားက မြင်ပြီဆိုရင်ပဲ ပြည့်စုံနေပါပြီ….´´

လက်ဟန်ခြေဟန်ဘာသာစကားဖြစ်ပေမယ့် သူမအဖို့တော့ ပြည့်စုံပါသည်။

`` သမီးရဲ့ကိုယ်ထဲမှာ ဂီတသွေးတွေ ပူနွေးဆူပွက်လာပြီဆိုတာနဲ့ …မျက်လုံးတွေကို အသာလေး…….မှိတ်လိုက် ….အဲဒီအခါ ဂီတကိုမြင်လာပါလိမ့်မယ် သမီး ဂျူနို ´´

.....................................................................................................................................

(၃)



ဂီတသံတို့ကား ဟုန်းဟုန်းမောက်ကြွ ။ ပင်လယ်လှိုင်းတံပိုးတို့ ပွက်ပွက်ဆူမြိုက်နေသည့်ပမာ။ ၀ုန်းကနဲ အမြင့်သို့။ ထိုမှ…. ရုတ်ကနဲ အောက်ဆုံးသို့။ ဤမှ….လူးကာလိမ့်ကာ၊ နိမ့်ချည် မြင့်ချည်။ နဂါးတစ်ကောင် ဒေါမာန်ပြင်းပြင်းဖြင့် လူးလွန့်လိမ့်ခါနေသည်သို့။ ပြီး …ကမ်း၏အခြေသို့ ဖြန်းကနဲ ရိုက်ဘိသကဲ့သို့။ စန္ဒယားခလုတ်များပေါ်ပြေးလွှားနေသော လက်ချောင်းအစုံတို့မှာကား ဘယ်မှညာ၊ ညာမှဘယ် ဝေ့ကာဝိုက်ကာ၊ လိမ့်ကာလူးကာ။ နားဆင်သူပရိတ်သတ်အဖို့ အသက်ရှူရန်ကိုပင် အမေ့မေ့အလျော့လျော့။ နှလုံးသားအစုံကို ညှစ်ခြေပြီး အမြင့်တစ်နေရာသို့ ပင့်တင်ခံလိုက်ရသလို။ ထိုမှ …ဆတ်ကနဲ ပြန်လွှတ်ချခံလိုက်ရသလို။ တေးသွားတို့ကား မြင့်ရာမှ…မြင့်ရာသို့။ထိုမှ…..ထပ်၍..ထပ်၍…မြင့်တက်….ပြီး….ဟုတ်ကနဲ အနိမ့်ဆုံးသို့အကျ…. တိကနဲ သံစဉ်အားလုံးပြတ်တောက်။ ပရိတ်သတ်အားလုံး တစ်စုံတစ်ခုမှ ရုတ်တရက်လွတ်မြောက်သွားသလို …။

``ရွှီး…………..ဖြောင်း………….ဖြောင်း……ဖြောင်း……….´´

``အက်ဖရို…..အက်ဖရို…..အက်ဖရိုဒိုက်တီ…..´´

ပွဲတော်ညမှာ သူမ၏အမည်ဖြင့် ဟိန်းဟိန်းညိုးညံလျှက်။


``ကျနော်တို့ပွဲတော်ရဲ့ နောက်ဆုံးပြိုင်ပွဲဝင်ဂီတပညာရှင် အက်ဖရိုဒိုက်တီပါ…သူ့ရဲ့ ထူးခြားအံ့မခန်းတဲ့ ဂီတပညာကို ပရိတ်သတ်များ မြင်တွေ့ခဲ့ပြီမို့ ယခုနှစ်ရဲ့ ပွဲတော်ည မီးရှူးတိုင်ကို ….. …..အဲ ….နောက်ဆုံးယှဉ်ပြိုင်မယ့် ဂီတပညာရှင်တစ်ယောက် ရှိနေပါသေးတယ်တဲ့ခင်ဗျာ….ပရိတ်သတ်များ ရှုစားကြပါ….´´

......................................................................................................................................

(၄)



တယောအိုလေးတစ်လက်ကိုအဖေါ်ပြုရင်း စင်မြင့်ပေါ်မှာ နေရာယူထားသူမှာ……သူမ…ဂျူနို

ပွန်းရာပဲ့ရာအထပ်ထပ်တယောအိုလေးကို ပုခုံးပေါ်တအိအိလွဲတင်…..။ မျက်လုံးအစုံကို အသာအယာ မှိတ်…..လိုက်…..ပြီး……..နောက်….. ….. …… …..

``သမီးက ဂီတကို ဖန်တီးချင်တာလား´´

ဂီတပညာရှင်အဖိုးအို၏ သက်ရှိထင်ရှားရှိခဲ့ချိန်က စကားသံတို့ နားထဲတွင်တရစ်ဝဲ၀ဲ။ ဘ၀ပေးအားနည်းချက်ကြောင့် အနှိမ်ခံခဲ့ရသည်များ……။ အဖိုးအိုနှင့် ယှဉ်တွဲဖျော်ဖြေခဲ့ရသည့် လမ်းဘေးဂီတပွဲများ…..။ လမ်းဘေးဂီတပညာရှင်အဖိုးအို၏ နောက်ဆုံးအချိန်များ…..။ …… ….များ ……….များ………..။ အရာအားလုံးမှာ ဂီတ။ သူမနှလုံးသားက တဖြည်းဖြည်းမြင်လာခဲ့ရပြီ။ ဒါဟာဂီတ။

``မျက်လုံးကမြင်ရမှ ဂီတမဟုတ်ဘူးသမီး…နှလုံးသားကမြင်နိုင်တွေ့နိုင်ရင်ပဲ ဂီတဖြစ်နေပါပြီ…´´

တယောကြိုးပေါ်တင်ထားသော ဘိုးတံက ညှင်းပြောင်းနွဲ့နွဲ့စတင်လှုပ်ရှားလာခဲ့ပြီ။ ဖေါက်ထွက်လိုက်ဂျူနိုဘ၀ရဲ့ကြမ်းတမ်းတဲ့ အမှတ်ရစရာတွေအားလုံးကို ဂီတအဖြစ်ဖေါက်ထုတ်လိုက်။

ကြမ်းတမ်းမှု၊ ခွန်အား၊ နူးညံ့မှု၊ အားငယ်ခြင်း….အားလုံးက တစ်လှည့်စီ၊ တစ်ကွက်စီ။ ဒါတွေဟာဂီတပဲဂျူနို။မရပ်လိုက်နဲ့။ တေးသွားတို့က တစ်ဆင့်ပြီးတစ်ဆင့်၊ တစ်ရစ်ပြီးတစ်ရစ် လွင့်ကာဝဲကာ၊ ဝေ့ကာဝိုက်ကာ။ အကျွမ်းကျင်ဆုံးကခြေသည်တစ်ယောက်က အနူးညံ့ဆုံး၊ အခမ်းနားဆုံး၊ အပေါ့ပါးဆုံး ကကွက်များကိုဖေါ်ကျူးနေသလို။ ပန်းချီဆရာတစ်ယောက်ရှေ့က ကင်းဗတ်စ်လိုမျိုး။ အဲဒီကင်းဗတ်စ်ဟာဂီတ။ ပန်းချီဆရာရဲ့ လက်အစုံယိမ်းနွဲ့သည့်အတိုင်း။စုတ်ချက်ကြမ်းကြမ်း၊ ဖွဖွညင်သာ၊ အဖိအဖေါ့ အရစ်အပင့် စုတ်ချက်တွေအားလုံးအပြီးမှာ…ဂန္ထ၀င်ပန်းချီကားတစ်ချပ် အသက်ဝင်လာသလိုမျိုး။ မရပ်နဲ့ဂျူနို။ လုံးဝမရပ်လိုက်နဲ့။ ဂီတထဲမှာ လွတ်မြောက်မှုကိုရှာလိုက်စမ်း။ ပိုးတုံးလုံးတစ်ကောင် အဖြစ်ကနေ လိပ်ပြာလေးတစ်ကောင် အဖြစ်ပေါ့။ ဖြတ်…..။ ရေမြေ။ တောတောင်။ချောက်ကမ်းပါး။ အားလုံးကိုဖြတ်ကျော်လိုက်စမ်းဂျူနို


ဂီတသံတို့ကား မရပ်မနား သည်းသည်းညံညံ။ လိပ်ပြာတစ်ကောင်အတောင်ခတ်သည်သို့။ အနူးညံ့ဆုံး….သို့သော် ခွန်အားအပြည့်ဖြင့်။ မရပ်မနား …..သို့သော် …မောပန်းခြင်းမရှိ။ တွေ့နေရပါပြီ။ သူမရဲ့ဂီတထဲမှာ ….သူမတွေ့နေရပြီ။ ရှေ့မှာလွတ်လပ်ကွင်းပြင်…..ထိုမှ ….အနွေးထွေးဆုံးကြိုလင့်နေမည့် နေမင်းဆီသို့ ……။ သူမလွတ်မြောက်သွားခဲ့ပါပြီ။ အားလုံးမှ…။အရာအားလုံးမှလွတ်မြောက်သွားခဲ့ပါပြီ။ နောက်ဆုံး သူမ၏ဂီတမှပင် လွတ်မြောက်သွားခဲ့ပါပြီ။ သံစဉ်အားလုံးရပ်တန့် …. …. …. ….

ခမ်းမတစ်ခုလုံးလည်း သည်းသည်းမှုန်မှုန်တ်ိတ်ဆိတ်။

……. ……….. ….. ……… ……… ……

ပရိတ်သတ်အားလုံးကို အသက်ရှူရပ်မတတ် ဂီတကခေါ်ဆောင်သွားခဲ့ပြီ။ တစ်စက္ကန့်…..နှစ်စက္ကန့်……သုံးစက္ကန့် …..နောက် …..စက္ကန့်ပေါင်းများစွာ…..ကြာမှ အသက်ပြန်ဝင်လာကြသလိုမျိုး ………

``ဟေး…… ရွှီ…….ဖြောင်း…..ဖြောင်း……ဖြောင်း…….. ……. ……. …….´´

လက်ခုပ်သံတို့မှာ ဘယ်တော့မှမရပ်တော့ဘူးဟု ထင်ရမလောက်။

``ဂျူနို ….ဂျူနို ……ဂျူနို …….ဂျူနို …….´´

သူမ၏အမည်မှာ မိုးထိအောင် ဟိန်းပွင့်လျှံဝေခဲ့ပြီ။ ပွဲတော်ည။ မီးရှူးတိုင် ထွန်းညှိရမည့်ည။ သူမ၏ည။ ဂျူနို၏ည။ ယခုနှစ်အတွက် မီးရှူးတိုင်ကို သူမ၏လက်ဖြင့် လင်းချင်းလက်ဖြာစေရတော့မည်….။




ကိုကြည်နိုင်

……………………………………………………………………

မှတ်ချက်(၁)

ညီမလေး မြလေးသျှင်တင်ထားခဲ့တဲ့ Movie လေးတစ်ခုကိုကြည့်ပြီး ရေးတတ်သလောက်လေး ပြန်ရေးကြည့်ပါတယ်။အဲဒီအတွက်လည်း သျှင့်ကို တကယ်ကျေးဇူးတင်ရပါတယ်။

မှတ်ချက်(၂)

လွန်ခဲ့တဲ့ ၁၁ နှစ်၊ ၁၉၉၉ ခုနှစ်က ပထမဆုံးဖတ်ဖူးခဲ့ပြီး အခုထိအကြိမ်ကြိမ်ပြန်ဖတ်နေဖြစ်သော

ဆရာတာရာမင်းဝေ၏ ``အရှေ့မြို့ရိုးမှ မိုးစက်များ´´၀တ္တုရှည်အရိပ်ကိုခိုပြီး ဒီဝတ္ထုကိုရေးပါတယ်။

မတန်မရာမို့ ရောက်ရာဘုံဘ၀မှ ခွင့်လွှတ်ပေးစေလိုပါကြောင်း…..ဆရာ တာရာမင်းဝေခင်ဗျာ….

မှတ်ချက်(၃)

အသုံးပြုထားသော အမည်များမှာ ဂရိနတ်သမိုင်းလာ အမည်များဖြစ်ပါတယ်။

ဂျူနို

ဂရိနတ်သမိုင်းတွင်အကျော်ကြားဆုံး နတ်တို့၏ထိပ်ခေါင် `ဇု´နတ်မင်း၏ နှမတော်ဖြစ်သည်။

ရောမတို့က`ဟီရာ´ ဟုအမည်သမှုတ်သော။ နူးညံ့ခြင်း၊ ကျော်ကြားခြင်း နှင့် ဂီတ၏ အမှတ်အသားဖြစ်သော နတ်ဖုရားမ။

အက်ဖရိုဒိုက်တီ

`ဇု´နတ်မင်း၏ အချစ်ဆုံးသမီး ဖြစ်သည်။ ပင်လယ်လှိုင်းတံပိုးမှ မွေးဖွားသည်ဟု ဂရိတို့ယုံကြည်ကြသည်။ မိန်းမတို့ ၏ အလှအပကို ကိုယ်စားပြုသော နတ်ဖုရားမ။ သောကြာဂြိုလ်ကိုအပိုင်စားရပြီး `ဗီးနပ်စ်´ ဟုလူသိများသည့် နတ်ဖုရားမဖြစ်သည်။

0 comments:

Post a Comment

Comment လေးတစ်ကြောင်း ဆိုပေမယ့်လို့ ကျနော့်အတွက်ကတော့

ဗီတာမင်တစ်သန်းပါ။ ကျေးဇူးပြုပြီး အခု Post နဲ့ပတ်သက်လို့

စာဖတ်သူရဲ့ ဝေဖန်စကားလေးပြောခဲ့ပါဦးခင်ဗျာ ...။